မိုးစက်ဝိုင်ရဲ့ပြိုင်ဘက်တဦးဖြစ်တဲ့ အာဖရိကနွယ်ဖွား အစ္စရေးအလှမယ်

ဒီနှစ်အတွက် မယ်စကြာဝဠာ သရဖူလုပွဲရောက်နေသူတွေက သူ့နည်းသူ့ဟန်နဲ့ ထူးခြားနေကြပါတယ်။
သူတို့ထဲက တယောက်ကတော့ အစ္စရေးအလှမယ်ပါ။
သူ့နာမည်က Titi Yitayish Ayanaw ဖြစ်ပါတယ်။


သူ့နိုင်ငံအလံနဲ့ တွေ့ရတဲ့ အစ္စရေးအလှမယ် (သူ့ဓာတ်ပုံတွေကို မယ်စကြာဝဠာ ၀က်ဆိုက်ကနေ ကူးယူပါတယ်)

အာဖရိကတိုက် အီသီယိုပီးယားနိုင်ငံမှာ မွေးဖွားသူဖြစ်ပြီး အသက် ၁၂ နှစ်အရွယ်မှာ အစ္စရေးကို ပြောင်းခဲ့သူပါ တဲ့။ သူက Herzliya မြို့မှာ ပညာသင်ယူနေသူပါ။ တက်နေတဲ့ကောလိပ်ကျောင်းနာမည်က The Interdisciplinary Center ဖြစ်ပါတယ်။

သူ့ပြောစကားတွေထဲက တခွန်းကို မယ်စကြာဝဠာ အင်တာနက်စာမျက်နှာမှာ အခုလို ကောက်နုတ်ထားတာ တွေ့ရမှာပါ။

"အစ္စရေးနိုင်ငံက ခပ်သေးသေး ဆိုပေမယ့် မတူကွဲပြားတဲ့ ယဉ်ကျေးမှုတွေ၊ အမြင်တွေ တစုဝေးတည်း ရှိနေပါတယ်"

အလှမယ် လေးစား အားအကျဆုံးက အိုဘားမားဖြစ်တယ် တဲ့။ အိုဘားမားက စူပါပါဝါတိုင်းပြည်ကြီးရဲ့ ထိပ်သီးဖြစ်တယ်၊ အာဖရိကနွယ်ဖွားလို့လည်း ဆိုနိုင်တာကြောင့် ဒီလို အားကျခြင်း ဖြစ်ပါလိမ့်မယ်။ (မတ်လတုန်းက အိုဘားမား ဂျေရုဆလင်ကို ရောက်တော့ သူ့နဲ့ တွေ့ခဲ့ပါသေးတယ်။)

ကဲ ... အလှမယ်ရဲ့ ရည်မှန်းချက်ကိုလည်း ကြည့်ပါအုံး -

"Titi dreams of becoming an ambassador of Israel"
အစ္စရေးကိုယ်စားပြုသံအမတ်တယောက် ဖြစ်လိုပါသတဲ့။

သူ့ အသက်က ၂၂ နှစ်။
အရပ်က ၅ ပေ၊ ၁၁ လက်မ။

ဆိုခဲ့သလိုပဲ အာဖရိကနွယ်ဖွား Titi Yitayish Ayanaw က အစ္စရေးကို ကိုယ်စားပြုပြီး မယ်စကြာဝဠာပြိုင်ပွဲကြီးကို ရောက်နေသူပါ။
သူ့ကို မြင်လိုက်တော့ အစ္စရေးဟာ အာဖရိကတိုက်ထဲမှာလားလို့ တွေးမိသူလည်း ရှိပါလိမ့်မယ်။


အာဖရိကနွယ်ဖွားတွေက အစ္စရေးမှာ လူနည်းစုပါ။ အွန်လိုင်းမှာ အစ္စရေး မော်ဒယ် ဆိုပြီး ရှာလိုက်ရင် အထက်က ပုံများအတိုင်း ဂျူးအမျိုးသမီးတွေလို့ ယူဆရတဲ့ပုံတွေပဲ တက်လာပါလိမ့်မယ်။ အာဖရိကနွယ်ဖွားအလှမယ် ဆိုတာ အစ္စရေးမှာ မျက်နှာဖုံးရှင်ဖြစ်ဖို့ ဆိုတာ အင်မတန် ကြုံတောင့်ကြုံခံဖြစ်ရပ်ပါ၊ အခုလို အစ္စရေးကို ကိုယ်စားပြုပြီး မယ်စကြာဝဠာစင်မြင့်ပေါ်တက်တာဟာလည်း ဒါ ပထမဆုံးအကြိမ် ဖြစ်နေပါတယ်။ ဒါကြောင့် လာမယ့် စနေနေ့မှာ မယ်အများစု မျှော်လင့်နေကြတဲ့ သရဖူကို သူ ဆောင်းနိုင်ခွင့် မရှိဘူး ဆိုရင်တောင်မှ သူ ဒီပြိုင်ပွဲအထိ တက်လှမ်းနိုင်တာဟာ အစ္စရေးရောက် အာဖရိကနွယ်ဖွားတွေအတွက် သမိုင်းတွင်တဲ့ ခြေလှမ်း ဖြစ်နေပါလိမ့်မယ်။

သူ့ပုံကို ဒီဘလော့မှာ မနေ့က ဖော်ပြခဲ့ပြီးပါပြီ။ http://blog.irrawaddy.org/2013/11/blog-post_6448.htmlမှာ ပြန်လည် ကြည့်ရှုနိုင်ပါတယ်။ ရေကူးဝတ်စုံနဲ့ ကိုယ်ဟန်ပြကြပုံတွေ ဖြစ်ပါတယ်။

သူ့ကို အာရှမျက်လုံးနဲ့ ကြည့်ရင် အဆင်ပြေချင်မှ ပြေပါလိမ့်မယ်။ မသေချာပါ။ သို့သော်လည်း အာရှအကြိုက် ဆိုတာ ဥရောပ၊ အမေရိက၊ အာဖရိက စသဖြင့်တို့နဲ့ ကွဲပြားမှာပါ။ အခုက မယ်စကြာဝဠာပြိုင်ပွဲ ဆိုတော့ ... ဒိုင်လူကြီးများကြိုက်ဖို့ အရေးကြီးပါတယ်။ သူတို့ ကြိုက်လို့ ရွေးမယ်၊ ကိုယ်ဟန်ပြမှုတွေ အဆင်ပြေမယ်၊ ဥာဏ်စမ်းမေးမြန်းမှုတွေ ဖြေဆိုမှု အဆင်ပြေမယ် ဆိုရင် အဲဒီ အလှမယ်က စနေနေ့မှာ သရဖူဆောင်းရဖို့ နီးစပ်ပါလိမ့်မယ်။ ဒီတော့ ... သရဖူ ဆောင်းသူက အစ္စရေးအလှမယ် ဖြစ်နိုင်သလို၊ မြန်မာပြည်ကိုယ်စားပြု မိုးစက်ဝိုင်လည်း ဖြစ်နိုင်ပါတယ်။

အစ္စရေးအလှမယ်ရဲ့ ပုံတွေကို ကူးယူ ဖော်ပြပေးလိုက်ပါတယ်။