အေးမြတ်မွန်၊ သက်ထား
ဂျပန်နိုင်ငံရှိ တိုကျိုစတော့ အိတ်ချိန်းကို တွေ့ရစဉ် (ဓာတ်ပုံ-နွဲ့ယဉ်အေး)
ငွေကြေးအရင်းအနှီးဈေးကွက် (Stock Exchange )ထူထောင်ရန် မြန်မာနိုင်ငံမှ ရာခိုင်နှုန်း ၅၁၊ ဂျပန်ဘက်မှ ရာခိုင်နှုန်း ၄၉ဖြင့် မ,တည်လုပ်ဆောင်သွားမည်ဖြစ်ပြီး ယင်းအတွက် ဂျပန်နိုင်ငံဘက်မှ စာချုပ်မူကြမ်းပေးပို့ထားပြီးဖြစ်ကြောင်း ဘဏ္ဍာရေး ဝန်ကြီးဌာန ဒုတိယဝန်ကြီး ဒေါက်တာမောင်မောင်သိမ်းက ဇန်နဝါရီ ၂၅ ရက်တွင် ပြောကြားသည်။
“အခုနောက်ဆုံး ဆန်ကာတင်လိုက်တာက ဒိုင်ဝါနဲ့ဂျပန်မှာရှိတဲ့ တိုကျိုအိတ်ချိန်းပါ။ မြန်မာကျပ်ငွေ ၃၂ ဘီလျံမှာ မြန်မာဘက်က ရာခိုင်နှုန်း ၅၁၊ ဂျပန်ဘက်က ရာခိုင်နှုန်း ၄၉ အသီးသီးထည့်ဝင်မှာပါ။ သူတို့ဘက်ကနေ စာချုပ်မူကြမ်းပို့ထားပြီးပြီ။ အဲဒါကိုကြည့်ပြီးတော့ ပြင်စရာရှိတာတွေကို ညွှန်ကြားထားတယ်။ သူတို့က ဆွေးနွေးပြီးတော့ ဒီမူကြမ်းကိုပြင်ပြီးရင် အဲဒါကိုရှေ့နေချုပ်ရုံးတို့၊ သမ္မတရုံးတို့ကိုတင်ပြီးတော့ အမိန့်ခံယူပြီးရင် စလည်ပတ်လို့ရပြီ။ စမယ်ဆိုတာကလည်း ပြင်ဆင်တာပေါ့”ဟု ၎င်းက ဆက်လက်ပြောကြားသည်။
စတော့အိတ်ချိန်းပေါ်ပေါက်ရန် ပြင်ဆင်မှုကို ၂ဝ၁၄ ခုနှစ် ဧပြီ ၁ ရက်တွင် စတင် ပြင်ဆင်သွားမည်ဖြစ်ပြီး စတင်အကောင်အထည်ဖော်မည့်ကာလမှာ ၂ဝ၁၅ ခုနှစ် အောက်တိုဘာလတွင် ခန့်မှန်းထားကြောင်း သိရသည်။
“ဒီကြားထဲမှာ ပြင်ဆင်ရေးတွေကိုလုပ်ရမှာက ကုမ္ပဏီတွေကို ပညာပေးတဲ့လုပ်ငန်းတွေလုပ်ရမယ်။ လာမယ့် ဖေဖော်ဝါရီလထဲမှာ ကုမ္ပဏီတွေကို စတော့အိတ်ချိန်းနဲ့ ပတ်သက်ပြီး ပညာပေးတဲ့အနေနဲ့ဟောပြောပွဲကြီးတစ်ခုလုပ်ဖို့ပြင်ဆင်ထားတယ်။ ၂ဝ ရက် ပတ်ဝန်းကျင်လောက်ပေါ့။ လူတိုင်းနားထောင်လို့ရအောင် အခမဲ့လုပ်မှာပါ။ပါဝင်မယ့် ကုမ္ပဏီတွေအနေနဲ့ကလည်း နိုင်ငံတကာ စံနှုန်းတွေရှိတယ်။ကုမ္ပဏီတိုင်းကိုလည်း မှတ်ပုံတင်ခွင့်မပေးပါဘူး။ ဒီမှာမှတ်ပုံတင်ထားတဲ့ ကုမ္ပဏီမှ သူ့ရဲ့ရှယ်ယာတွေကို ထုတ်ရောင်းခွင့်ရမှာပါ။ စံနှုန်းနဲ့ညီတဲ့ ကုမ္ပဏီတွေက ခိုင်မာတဲ့ ကုမ္ပဏီတွေဖြစ်ရမယ်။ အဲဒါမှ ဒီအိတ်ချိန်းမှာ ဝယ်တာတွေက စိတ်ချရမယ်။ များသောအားဖြင့်က အများပိုင်ကုမ္ပဏီတွေ ထောင်တယ်။ စည်းကမ်းတကျမလုပ်ဘူး။ ပိုက်ဆံထည့်ပြီးတော့ ပိုက်ဆံဆုံးသွားတာတွေ ဖြစ်ခဲ့ဖူးတယ်။ကမ္ဘာမှာလည်း ဖြစ်ခဲ့ဖူးတယ်။ အခု အဲ့ဒါမျိုးတွေ မဖြစ်အောင် စတော့အိတ်ချိန်းမှာပါမယ့် ကုမ္ပဏီတွေက လာလျှောက်တဲ့အခါ မှာ သတ်မှတ်ထားတဲ့စံနှုန်းနဲ့ ညီမညီ စစ်တယ်။ ညီပြီဆိုရင် ခိုင်မာတဲ့ကုမ္ပဏီဆိုတာ သေချာသွားပြီ။ အဲ့ဒီကုမ္ပဏီတွေကိုသာ စတော့အိတ်ချိန်းမှာ မှတ်ပုံတင်ခွင့်ပေးမယ်”ဟု ဆိုသည်။
မြန်မာနိုင်ငံတွင်အများပိုင်ကုမ္ပဏီ ၁ဝ၅ ခုရှိနေပြီး စတော့အိတ်ချိန်းစာရင်းဝင်ရန်သတ်မှတ်ခံရသည့် ကုမ္ပဏီမှာမူ အနည်းငယ်သာရှိနေသေးကြောင်းသိရသည်။
0 comments:
Post a Comment