အောင်မျိုးသန့်၊ ဝေလင်းအောင်
ပေါက်ကွဲမှုဖြစ်ပွားခဲ့သည့် လိုင်ခန်းနေရာအား စီအိုင်ဒီရဲတပ်ဖွဲ့ဝင်တစ်ဦးက စစ်ဆေးနေစဉ် (ဓာတ်ပုံ-အောင်မျိုးသန့်)
မင်္ဂလာဒုံမြို့နယ် ထောက်ကြန့်မြို့ ဇကရာဇ်ရပ်ကွက် ရန်ကုန်မြို့တော်စည်ပင်သာယာရေးကော်မတီ ပတ်ဝန်းကျင်ထိန်းသိမ်းရေးနှင့် သန့်ရှင်းရေးဌာန၀န်ထမ်းများ လိုင်းခန်းတွင် ဇန်န၀ါရီ ၂၃ ရက် နံနက် ၇ နာရီက ပေါက်ကွဲမှုတစ်ရပ်ဖြစ်ပွားခဲ့ပြီး ကလေးငယ်နှစ်ဦး အပြင်းအထန်ဒဏ်ရာရရှိခဲ့ကြောင်း သိရသည်။
ပေါက်ကွဲဖြစ်ပွားခဲ့သည့် လိုင်းခန်းမှာ ၁၀ ပေပတ်လည် ဓနိမိုး၊ ၀ါးကာ စည်ပင်သန့်ရှင်းရေးဝန်ထမ်းများ နေထိုင်သည့် နေရာတွင်ဖြစ်ပြီး ယင်းပေါက်ကွဲမှု ဖြစ်ပွားချိန်တွင် အိမ်၌ ကလေးငယ်နှစ်ဦးနှင့် အမေ ဖြစ်သူတို့သာ ရှိကြောင်းသိရသည်။
“ကျွန်မတို့က နောက်ဘက်အိမ်မှာနေတာပါ။ စဖြစ်တော့ ၀ုန်းဆိုတဲ့အသံကို ကြားလိုက်ရတယ်။ ဒါပေမဲ့ နံနက်အစောပိုင်းဆိုတော့ ကားဘီးပေါက်တယ်ပဲ ထင်တာ။ နောက်တော့ ကလေးငယ်နှစ်ဦးရဲ့ အမေက ကယ်ကြပါဦးအော်တော့ လိုင်းခန်းကလူတွေ အားလုံး သူရဲ့အိမ်ကို သွားကြတော့။ ကလေးငယ်နှစ်ဦးရဲ့လက်တွေမှာ ကွဲနေပြီး သွေးတွေထွက်နေတာ တွေ့ရတယ်။ အဲဒီတော့ လိုင်းခန်းကလူတွေ ရုံးကတာဝန်ခံတွေကိုခေါ်ပြီး နီးစပ်ရာဆေးရုံကို ကားငှားပြီးပို့လိုက်တယ်။ဘယ်လိုပေါက်ကွဲခဲ့လဲ ဆိုတာကိုတော့ ကျွန်မ တို့လည်း မတွေ့လိုက်ပါဘူး” ဟု ၀န်ထမ်းလိုင်းခန်းတွင် နေထိုင်သူ မစံပယ်က ပြောပြသည်။
အဆိုပါပေါက်ကွဲမှု ဖြစ်ပွားခဲ့သည့်နေရာကို တပ်မတော်အင်ဂျင်နီယာတပ်ရင်းနှင့် စီအိုင်ဒီမှုခင်းရဲတပ်ဖွဲ့တို့ လာရောက်စစ်ဆး ရှာဖွေမှုများပြုလုပ်ခဲ့ပြီး ပေါက်ကွဲရခြင်း အကြောင်းရင်းနှင့် ပေါက်ကွဲခဲ့သည့် ပစ္စည်းအမျိုးအစားကို ရှာဖွေစစ်ဆေးနေဆဲ ဖြစ်ကြောင်း သိရသည်။
ယင်းပေါက်ကွဲမှုဖြစ်စဉ်နှင့် ပတ်သက်၍ စီအိုင်ဒီရဲတပ်ဖွဲ့မှ ရဲမှူးဇော်သန်းက “အခု ပေါက်ကွဲမှုဖြစ်ခဲ့တဲ့ အိမ်ကို စစ်ဆေးရှာဖွေမှုတွေ ပြုလုပ်နေတယ်။ ပေါက်ကွဲမှုဖြစ်ခဲ့တဲ့ အစအနကို ရှာဖွေလို့မရသေးဘူး။ အဲဒီပစ္စည်း တစ်စုံတစ်ရာတွေ့မှပဲ ဘာပေါက်ကွဲမှုလဲဆိုတာကို ကောက်ချက်ချလို့ရမယ်။ ကလေးတွေရဲ့ ဒဏ်ရာကိုကြည့်ပြီးမှလည်း သုံးသပ်လို့ရနိုင်မယ်။ ကလေးတွေကိုတော့ မတွေ့ရသေးပါဘူး။ ပျက်စီးခဲ့တဲ့ နေရာကလည်း ၀ါးကြမ်းကျွံသွားတာပဲဖြစ်လို့ အသေးစား ပေါက်ကွဲမှုပဲဖြစ်ပါတယ်” ဟု ဇန်န၀ါရီ ၂၃ ရက် အခင်းဖြစ်ပွားနေရာတွင် ပြောကြားသည်။
ယင်းသို့ ပေါက်ကွဲမှု ဖြစ်ပွားခဲ့သည်ကို ပြည်ထဲရေးဝန်ကြီးဌာန အွန်လိုင်းစာမျက်နှာတွင် ဖော်ပြခဲ့ပြီး ကလေးငယ်နှစ်ဦးမှ အိမ်ရှေ့ဝင်ပေါက်နေရာ၌ ပစ္စည်းဟောင်းတစ်ခု (စိစစ်ဆဲ) ကို လက်ဖြင့် ထုရိုက်ကစားစဉ် ပေါက်ကွဲမှု ဖြစ်ပွားခဲ့ကြောင်းနှင့် ပေါက်ကွဲမှုကြောင့် အသက် ရှစ်နှစ်အရွယ် မောင်မျိုးကို ၏ မျက်နှာ၊ လက်၊ ၀မ်းဗိုက်တို့တွင် အပြင်းအထန်ဒဏ်ရာများ ရရှိခဲ့ပြီး အသက် ၁၀ လ အရွယ် မခိုင်သဇင်ဝင်း၏ လက်နှင့်ဝမ်းဗိုက်တို့လည်း အပြင်းအထန်ဒဏ်ရာများရရှိကာ ရန်ကင်းဆေးရုံကြီးတွင် အတွင်းလူနာ (စိုးရိမ်ရ) ဖြင့် ကုသနေကြောင်း သိရသည်။
0 comments:
Post a Comment