၂၀၁၃ ခုနှစ် ဒီဇင်ဘာ ၃ ရက်တွင် မြို့တော်ကိဗ်ရှိ ပါလီမန်တွင် ရာထူးမှနုတ်ထွက်ရန် မဲခွဲမှုအပြီး အမတ်များကို နှုတ်ဆက်နေသော ယင်းအချိန်က ယူကရိန်းဝန်ကြီးချုပ် အဇာရော့ဗ် (Photo:AFP)
ယူကရိန်းတွင် ပဋိပက္ခဆိုးရွားစွာ ဖြစ်ပွားနေမှုကို ပြေလျော့စေရန်နှင့် ညီညွတ်မှုခိုင်မာစေရန် ကြိုးပမ်းမှုအဖြစ် ယူကရိန်းဝန်ကြီးချုပ် မိုင်ကိုလာအဇာရော့ဗ်က ဇန်န၀ါရီ ၂၈ ရက်တွင် ရာထူးမှနုတ်ထွက်ခဲ့ကြောင်း သိရသည်။ ယူကရိန်းသမ္မတ ဗစ်တာယာနူကိုဗစ်က ထောက်ခံခဲ့သော ပြုပြင်ပြောင်းလဲရေး အစီအစဉ်များနှင့် သဘောတူညီချက်များအပေါ် ပါလီမန်က မဲခွဲဆုံးဖြတ်ရန် စီစဉ်နေချိန်တွင် အဇာရော့ဗ်က သူ၏ပုဂ္ဂိုလ်ရေး ဆုံးဖြတ်ချက်အရ ရာထူးမှနုတ်ထွက်ခဲ့ခြင်းဖြစ်ကြောင်း ပြောကြားခဲ့သည်။
ယူကရိန်းမြို့တော်ကိဗ်ရှိ လွတ်လပ်ရေးရင်ပြင်တွင် အခြေစိုက်ကာ ဆန္ဒပြမှု ပြုလုပ်နေသူများ၏ အဓိကတောင်းဆိုချက် တစ်ခုဖြစ်သော ၀န်ကြီးချုပ် နုတ်ထွက်ပေးရေး အချက်ကို အဇာရော့ဗ်က လိုက်လျောခဲ့ခြင်းလည်းဖြစ်သည်။ မိမိနုတ်ထွက်မှုသည် ပဋိပက္ခကို ငြိမ်းချမ်းစွာ ဖြေရှင်းနိုင်ရေးအတွက် နိုင်ငံရေးအရ ညှိနှိုင်းမှု တစ်ခုအတွက် ဖြစ်နိုင်ခြေတစ်ခု ဖန်တီးနိုင်မည်ဟု မျှော်လင့်ကြောင်း အဇာရော့ဗ်က ပြောကြားခဲ့သည်။
အဇာရော့ဗ်နုတ်ထွက်မှုနှင့် ပတ်သက်ပြီး အတိုက်အခံများဘက်မှ မှတ်ချက်ချက်ချင်း မထွက်လာသေးပေ။ အတိုက်အခံပါတီ တစ်ခုဖြစ်သော Fatherland ပါတီမှ ပြောခွင့်ရပုဂ္ဂိုလ်ကမူ ယင်းနုတ်ထွက်မှုကို သမ္မတယာနူကိုဗစ်က အတည်ပြုကြောင်း သတင်းကိုစောင့်ဆိုင်းနေသည်ဟု ပြောကြားခဲ့သည်။
အဇာရော့ဗ် ရာထူးမှမနုတ်ထွက်မီ အစိုးရနှင့် အတိုက်အခံတို့အကြား တွေ့ဆုံဆွေးနွေးပွဲများတွင် သမ္မတယာနူကိုဗစ်က အတိုက်အခံခေါင်းဆောင်တို့အား ၀န်ကြီးချုပ်ရာထူး ကမ်းလှမ်းခဲ့သည်။ သို့သော် အတိုက်အခံ အဓိကခေါင်းဆောင်များဖြစ်သော UDAR (Punch) ပါတီခေါင်းဆောင် ကမ္ဘာ့လက်ဝှေ့ချန်ပီယံဟောင်း ဗစ်တာကလက်ရ်ှကိုနှင့် Fatherland ပါတီခေါင်းဆောင် အာဆင်နီယတ်ဆင်ယက် နှစ်ဦးစလုံးက ပယ်ချခဲ့ကြောင်း သိရသည်။
ယူကရိန်းမြို့တော်ကိဗ်ကို စစ်မြေပြင်အသွင် ပြောင်းလဲသွားစေခဲ့သော အချိန်နှစ်လခန့် ရှိလာခဲ့ပြီဖြစ်သည့် ဆန္ဒပြသူများနှင့် ရဲတပ်ဖွဲ့တို့အကြား ထိပ်တိုက်ရင်ဆိုင်မှုများ အဆုံးသတ်နိုင်ရေးအတွက် အဓိကကျသော ပြုပြင်ပြောင်းလဲမှုများ လုပ်ဆောင်ရန် ယာနူကိုဗစ်ကို ဥရောပသမဂ္ဂနှင့် အမေရိကန်တို့က အကြီးအကျယ် ဖိအားပေးခဲ့သည်။
အတိုက်အခံခေါင်းဆောင်များနှင့် လေးနာရီကြာ တွေ့ဆုံဆွေးနွေးခဲ့ပြီးနောက် အငြင်းပွားဖွယ်ဖြစ်ပွားနေသော ဇန်န၀ါရီ ၁၆ ရက်တွင် ပြဋ္ဌာန်းခဲ့သည့် ဆန္ဒပြမှု ပိတ်ပင်ရေးဥပဒေကို ပယ်ဖျက်ရန်နှင့် အစိုးရအဆောက်အအုံများနှင့် လမ်းများပေါ်တွင် ဖမ်းဆီးထောင်ချခံရသော ဆန္ဒပြသူများအား လွတ်ငြိမ်းချမ်းသာခွင့်ပေးရန် သဘောတူကြောင်း သမ္မတရုံးက ထုတ်ပြန်ပေးခဲ့သည်။
ယူကရိန်းပဋိပက္ခမှာ လာမည့်ဥရောပသမဂ္ဂနှင့် ရုရှားတို့အကြား ထိပ်သီးတွင် အဓိကလွှမ်းမိုးနေမည်ဖြစ်သည်။ ယင်းထိပ်သီးသို့ တက်ရောက်မည့် ရုရှားသမ္မတ ဗလာဒီမာပူတင်ကလည်း ယူကရိန်းပဋိပက္ခကို ဖေဖော်ဝါရီ ၇ ရက်တွင် ကျင်းပမည့် ဆိုချီဆောင်းရာသီ အိုလံပစ်ပြိုင်ပွဲအပေါ် အရိပ်လွှမ်းမိုးနေမည်ကို မလိုလားကြောင်း သိရသည်။
Ref:AFP
0 comments:
Post a Comment