အလောင်းပုပ်ပွ အနံ့များကြောင့် ဓာတ်ငွေ့ကာ မျက်နှာဖုံး ၀တ်ဆင်ထားသော ဖိလစ်ပိုင်စစ်သားများ ပျက်စီးနေသော အိမ်များအကြား စက်တင်ဘာ ၂၆ ရက်က ကင်းလှည့်နေစဉ် (Photo:AFP)
ဖိလစ်ပိုင် တောင်ပိုင်းတွင် ဓားစာခံ ၂၀၀ နီးပါးကို ဖမ်းဆီးထားသော မွတ်စလင် သူပုန်များနှင့် သီတင်းပတ်သုံးပတ်ကြာ စစ်ဆင်ရေး ပြီးဆုံးသွားပြီဖြစ်ပြီး ဖမ်းဆီးခံထားရသူအားလုံး လွတ်မြောက်ခဲ့ပြီဖြစ်ကြောင်း ဖိလစ်ပိုင် ကာကွယ်ရေးဝန်ကြီး Voltaire Gazmin က စက်တင်ဘာ ၂၈ ရက်တွင် ပြောကြားခဲ့သည်။ အစိုးရတပ်များက ကယ်တင်ခြင်းနှင့် မိုရိုအမျိုးသား လွတ်မြောက်ရေးတပ်ဦး (MNLF) က လွှတ်ပေးခြင်းတို့ကြောင့် လွတ်မြောက်လာသူ ဓားစာခံ ၁၉၅ ဦး ရှိခဲ့ကြောင်း သိရသည်။
၁၉ ရက်ကြာ ဖြစ်ပွားခဲ့သည့် တိုက်ပွဲများအတွင်း သူပုန် ၁၆၆ ဦး၊ အစိုးရနှင့် ရဲတပ်ဖွဲ့ဝင် ၂၃ ဦးနှင့် အရပ်သား ၁၂ ဦး သေဆုံးခဲ့ကြောင်း စစ်တပ်က ထုတ်ပြန်ထားသည်။ ဖမ်းဆီးထားသည့် သူပုန် ၂၃၈ ဦးကို လက်နက်ကိုင် ပုန်ကန်မှု၊ နိုင်ငံတကာ လူ့အခွင့်အရေး ဥပဒေကို ချိုးဖောက်မှုများဖြင့် တရားစွဲဆို သွားမည်ဖြစ်ကြောင်း သိရသည်။
"သူပုန်တွေ ဖမ်းဆီးထားတဲ့ ဓားစာခံ မကျန်တော့ဘူးဆိုတာ သိရှိရပါတယ်" ဟု ဖိလစ်ပိုင်စစ်တပ် ပြောရေးဆိုခွင့်ရပုဂ္ဂိုလ် ဗိုလ်မှူးချုပ် ဒိုမင်ဂိုတူတန်က သတင်းထောက်များကို ပြောကြားခဲ့သည်။ ဗိုလ်မှူးချုပ် တူတန်က အစိုးရတပ်ဖွဲ့များ၏ စစ်ဆင်ရေးသည် မပြီးသေးကြောင်း၊ လက်တစ်ဆုပ်စာ သူပုန်အချို့သည် ပုန်းအောင်းနေသေးကြောင်း ပြောကြားထားသည်။ "မြို့တွေထဲမှာ သူပုန်တွေ ကျန်နေပါသေးတယ်။ သူတို့အထဲက တစ်ယောက်ကျန်သေးတယ် ဆိုရင်တောင်မှ သူ့အနေနဲ့ လူတွေကို ပစ်သတ်နိုင်ပါသေးတယ်" ဟု တူတန်က ပြောကြားသည်။
ဖိလစ်ပိုင်သမ္မတ ဘီနစ်နိုအကွီနို၏ ပြောရေးဆိုခွင့်ရ အမျိုးသမီး အဘီဂေးဗယ်တီက "တိုက်ပွဲတွေ စဖြစ်တဲ့နေ့ကစပြီး ကျွန်မတို့ရဲ့ တာဝန်က ဓားစာခံတွေ အန္တရာယ်ကင်းရှင်းရေး အတွက်ပါပဲ။ အရပ်သားတွေကို အန္တရာယ် ကင်းရှင်းစွာ ပြန်ခေါ်နိုင်ရေးဖြစ်ပြီး အခုဒီတာဝန်တွေ ပြီးစီးသွားခဲ့ပါပြီ" ဟု နိုင်ငံပိုင် အသံလွှင့် ဌာနမှတစ်ဆင့် ပြောကြားခဲ့သည်။
ယခု တိုက်ခိုက်မှုများကို ဦးဆောင်ခဲ့သည့် MNLF သူပုန်ခေါင်းဆောင် ဟာဘာမာလစ်နှင့် တိုက်ခိုက်မှုကို ကြိုးကိုင်ဆောင်ရွက် ခဲ့သည်ဆိုသော MNLF အဖွဲ့ ထူထောင်ခဲ့သူ နူအာမစ်ဆူအာရီတို့ ပုန်းအောင်းနေသည့် နေရာကို မသိရှိရသေးပေ။
အခြား မွတ်စလင် သူပုန်အဖွဲ့နှင့် အစိုးရတို့အကြား ပြုလုပ်နေသော ငြိမ်းချမ်းရေး ဆွေးနွေးပွဲများကို ပျက်စီးစေရန်အတွက် တိုက်ခိုက်မှုများ ပြုလုပ်ရန် မစ်ဆူအာရီက မာလစ်နှင့် သူပုန်ရာပေါင်းများစွာကို ဇမ်ဘိုအန်ဂါမြို့သို့ စေလွှတ်ခဲ့ကြောင်း သိရသည်။
Ref:AFP
0 comments:
Post a Comment