Nov 25, 2013
အခြားသူတွေတော့မသိပါ။ ကျွန်တော်ကတော့ မြန်မာလူမျိုးဖြစ်ရတာ ဒီရေ၊ ဒီမြေမှာ ရှင်သန်ခွင့်ရတာ လွန်စွာ ဂုဏ်ယူမိပါသည်။ လူဖြစ်ရကျိုးနပ်သည်ဟုလည်း ယူဆပါသည်။ ရှင်းပြအံ့။
အလှူရေစက် လက်နဲ့မကွာတဲ့လူမျိုး၊ အိမ်မှာမရှိရင်နေ အလှူအတန်းအတွက် မတွန့်မတို တတ်စွမ်းသမျှ ပါဝင်ကြ။ သဒ္ဒါတရား၊ သဒ္ဒါစိတ်ထားပေါ့၊ ဘယ်လောက်စိတ်ထားမြင့်မြတ်တဲ့ လူမျိုးလဲ။
နောက်တစ်ခု အမျိုးသားရေး၊ ဘာသာရေးနဲ့ပါတ်သက်တဲ့ ပွဲလမ်းသဘင်တွေကိုကြည့်၊ ဆယ့်နှစ်လရာသီပတ်လုံးအတိ၊ ထပ်တာမရှိ။ ဒီလိုဒီလို စိတ်ချမ်းသာစရာ
ပျော်ရွှင်မှုတွေနဲ့ပြည့်နေတဲ့တိုင်းပြည်၊ အဖြူစင်ဆုံး၊ အပြုံးအလှပိုင်ရှင်တွေစုဝေးရာ တိုင်းပြည်ပါ။
ခုလည်းဒါနဲ့ပါတ်သက်ပြီး မျက်စိစူးစရာကိစ္စလေးတွေ့လို့ တွေးမိရေးမိတာပါ။ သတင်းတစ်ခုဖတ်လိုက်ရတယ်။ ၂၀၁၃ ခုနှစ် နိုဝင်ဘာလ ၂၃ ရက်နေ့မှ ၂၄ ရက်နေ့ထိ ဈေးရောင်းပွဲတော်ပြုလုပ်မယ့်သတင်း။ ပိုပြီးစည်ကားအောင် မော်ဒယ်ရှိုးပွဲတွေပါ ထည့်ထားသတဲ့။ ကျင်းပမည့်နေရာက နေပြည်တော်ရဲ့ အထင်ကရ၊ ဘာသာရေးအထွဋ်အမြတ် ဥပ္ပါတသန္တိစေတီတော်မြတ်ကြီးရဲ့ရှေ့ ရာဇဌာနီလမ်းမကြီးဘေး ဥပ္ပါတသန္တိကွင်းထဲမှာတဲ့။
ကျွန်တော်တွေ့ဖူးတဲ့ မြန်မာနိုင်ငံက မော်ဒယ်ရှိုးပွဲတွေကြည့်လိုက်ရင် တစ်ခုမှမြန်မာမဆန်ပါ။ ကမ္ဘာဆန်သည်ဟုပဲ ဆိုကြပါတော့။ လူမြင်ကွင်းထဲမှာ အပြိုင်အဆိုင် တတ်နိုင်သလောက် ဖော်ထုတ်ပြသနေကြတဲ့ပွဲတွေ၊ ထားပါတော့ မကြည့်ချင်ရင် မသွားရုံပေါ့။ ထားလို့မရတာက ဒီပွဲလုပ်တဲ့နေရာက ဘုရားကြီးရဲ့ ပရ၀ုဏ်တစ်ဝိုက်ဖြစ်နေတယ်။ ဒါတွေနဲ့အတူ အခြားသော အညှီအဟောက်တွေလည်း တရုန်းရုန်းနဲ့ တွေးမိပြီး စိတ်ထဲမသက်မသာ ခံစားမိတယ်။ ပွဲကျင်းပတဲ့လူတွေရော၊ ခွင့်ပြုတဲ့တာဝန်ရှိသူတွေရော ဒါကိုတွေးမိရဲ့လားမသိ။
စတုတ္ထမဏ္ဍိုင်ဆိုတဲ့ လူတွေလည်း ဒါမျိုးတွေ စဉ်းစားမိ၊ တွေးမိပုံမရ၊ ကြော်ငြာသမားလုပ်ဖို့နဲ့ တံဆိပ်ခေါင်းကပ် အရေးအသားတွေနဲ့ တောင်ဖွမြောက်ဖွလုပ်ဖို့လောက်ပဲ ကိုယ့်ဂျာနယ် အစွန်ထုတ်နိုင်ဖို့လောက်ပဲ စိတ်ဝင်စားနေကြတဲ့ပုံပါဘဲ။
အမျိုး ဘာသာ၊ သာသနာအတွက်ပါ။ ကိုယ့်အမျိုးကိုချစ်လို့ပြောတာပါ။ ရေးတာပါ စသည် စသည် ပြောနေ၊ ရေးနေကြတာ ကြားဖူး ဖတ်ဖူးပါသည်။ မဆိုးပါ၊ ခံယူချက်လေးတွေကောင်းပါ၏။သို့သော တစ်ခုတော့ စဉ်းစားကြပါ။ ထုတ်ဝေလိုက်တဲ့ စာအုပ်၊ စာစောင်တွေက ထောင်ဂဏန်းမျှသာ၊ မြန်မာနိုင်ငံက လူဦးရေ သန်း ၆၀၊ ဒါတောင် အချို့စာအုပ်တွေ ဆိုင်ပေါ်မှာ ဖုန်တွေတက်နေတာ အကြာကြီး။ ဆိုလိုတာက စာဖတ်အားရော၊ စာပေဗဟုသုတပိုင်းရော အားနည်းတဲ့လူတွေကြားထဲမှာ အရေးကောင်း၊ အပြောကောင်းဆိုရင် သဘောကျလိုက်တာပဲ။ လက်ခုပ်ထတီးလိုက်တာပဲ။စဉ်းစားချင့်ချိန်နိုင်စွမ်း
နည်းတယ်။ အသိပညာနိုးကြားမလာပဲ ဆူပူလှုံ့ဆော်တဲ့ဘက် ဦးတည်သွားမှာစိုးရ၏။ စတုတ္ထမဏ္ဍိုင်အရေးကြီးပါသည်။
မြန်မာဘောလုံးအသင်း နိုင်ငံတကာ ခြေစမ်းပွဲတွေကန်ပြီး ရလာဒ်တွေကြည့်လိုက်ရင် ၇ ဂိုး ၁ ဂိုး၊ ၈ ဂိုး ၁ ဂိုး စတဲ့ ရလာဒ်ဆိုးတွေနဲ့လည်းပဲ ကြုံနေရတာများပါတယ်။ ဘောလုံးပွဲဆိုတော့ ဂိုးပေါက်ထားပြီး ဘောလုံးတည်ကန်ကြတာဆိုတော့ ဘယ်နှစ်ဂိုးလဲဆိုတာ ရှင်းရှင်းမြင်ရသိရတယ်။ ဆက်တွေးကြည့်ရင် စီးပွားရေး၊ လူမှုရေး၊ ယဉ်ကျေးမှုကအစပေါ့၊ အခြားအခြားသောကဏ္ဍတွေ အားလုံးလည်း ယဉ်ကြည့်ရင် ၈ ဂိုး ၁ ဂိုးပါပဲ။ ဘာသာရေးကတော့ ၈ ဂိုး ၁ ဂိုး အဖြစ်ခံလို့ မရဘူးထင်ရဲ့။
ရွှေမြန်မာတို့ရဲ့ အချို့အချို့သော အဖွဲ့အစည်း အသင်းအပင်းတွေရဲ့အကြောင်းပါ စဉ်းစားရင်း တစ်ခုသွားသတိရမိတယ်။ ပြီးခဲ့တဲ့ နှစ်ကုန်ပိုင်းလောက်က မီးရထားနဲ့ ခရီးတစ်ခုသွားရင်း ကပ်လျက်ထိုင်ခုံကခရီးသွားတစ်ဦးနဲ့ စကားစပ်မိပြောမိတယ်။
သူက အိမ်မွေး နိုင်ငံခြားဖြစ်ခွေးလေးတွေကို လှည့်လည်ပြီး သင်တန်းပေးတဲ့သူတစ်ယောက်ပါ။ ထိုင်၊ ထ၊ ၀ပ်၊ ပြေး၊ ပစ္စည်းကောက် စသည်ဖြင့်ပေါ့။ ကျွန်တော်ကမေးကြည့်တယ်။ ကျွန်တော်တို့ ပြည်တွင်းဖြစ်မြန်မာခွေးတွေရော သင်လို့မရဘူးလားလို့...ဆိုတော့..ရတယ်ဗျ။ ဒါပေမယ့် အချိန်ပေးရမယ်၊ မျိုးဆက်ပွားယူရမယ်တဲ့။ နားမရှင်းလို့ ဘယ်လိုမျိုးလဲဆိုတော့.. ခင်ဗျားအိမ်မှာ မြန်မာခွေး အထီးအမတစ်စုံကို ခြံနဲ့ စနစ်တကျမွေးပါ။ သူတို့ကနေ ပေါက်ဖွားလာမယ့် အထီး အမလေးတွေကိုလည်း ဒီအတိုင်း သီးသန့်မွေးကျွေး၊ စနစ်တကျလှောင်ထား။ နောက်တစ်ဆင့်၊ နောက်တစ်ဆင့်စသဖြင့်ပေါ့။ ၃ ဆက်လောက်အထိ မျိုးပွား သန့်စင်ပြီးမှ စတင် လေ့ကျင့်သင်ကြားပေးနိုင်ပါပြီတဲ့။ တဖြည်းဖြည်း နိုင်ငံတကာအဆင့်မီအောင်ပေါ့။
ရိုင်းတယ်လို့မထင်စေချင်ပါ။ ကျွန်တော်တို့ အချို့အချို့သော အသင်း၊ အဖွဲ့တွေကိုလည်း ပိုးမွေးသလိုမွေးလို့မရ၊ ခွေးမွေးသလိုမွေးရမယ်ထင်တယ်။ ကမ္ဘာကျော်ဘောလုံးသမားလေး
ဒေါ်လာသန်းရာဂဏန်းနီးပါးတန်ကြေးရှိ ခြေစွမ်းပိုင်ရှင် ပေါ်တူဂီနိုင်ငံသား ရော်နယ်လ်ဒိုဟာ ငွေကြေးကြောင့်ခြေစွမ်းထက်မြက်တာလား၊ ခြေစွမ်းထက်မြက်လို့ ငွေကြေးဖြစ်တာလား စဉ်းစားမိကြမှာပါ။ဘယ်သူ့မှ လွှဲမချကြပါနဲ့။အမျိုး၊ ဘာသာ ၊သာသနာအတွက် ခေတ်မှီ ဒီမိုကရေစီနိုင်ငံတော်သစ်ကြီးအတွက် ပြိုင်တူတွန်းမှ ရွှေ့မှာပါ။သင်ရော ၈ ဂိုး ၁ ဂိုး ဖြစ်ချင်ပါသလား။
မျိုးချစ်မောင်
0 comments:
Post a Comment