မိခင်မှတစ်ဆင့် ကလေးငယ်များအပေါ် ကူးစက်တတ်သည့် ကူးစက်ရောဂါများ၊ အာဟာရဖြည့်စွက် စားသောက်နည်း ပုံစံများ အပါအ၀င် ကလေးသူငယ် ရှင်သန်ဖွံ့ဖြိုးရေးအတွက် အသိပညာပေး စကားများကို Transit Media (ရွေ့လျားအသိပညာပေး) အစီအစဉ်ဖြင့် ပထမဆုံးအကြိမ် စတင်လုပ်ဆောင်လျက်ရှိကြောင်း သိရသည်။
အဆိုပါ အစီအစဉ်ကို ကုလသမဂ္ဂ ကလေးများ ရန်ပုံငွေအဖွဲ့ ယူနီဆက်(ဖ်) မှ အဓိက ပံ့ပိုးပေးထားခြင်းဖြစ်ပြီး ကျန်းမာရေး ၀န်ကြီးဌာန၊ ကမ္ဘာ့ကျန်းမာရေးအဖွဲ့၊ ကုလသမဂ္ဂ လူဦးရေ ရန်ပုံငွေ အဖွဲ့တို့ ပူးပေါင်းလုပ်ဆောင် ခဲ့ခြင်းဖြစ်ကြောင်းနှင့် ရန်ကုန်၊ မန္တလေး၊ နေပြည်တော် တိုင်းဒေသကြီးများ အပါအ၀င် ကရင်၊ မွန်နှင့် ရခိုင်ပြည်နယ်များတွင် လုပ်ဆောင်သွားမည်ဖြစ်ကြောင်း သိရသည်။
"အသိပညာပေး စာတွေကို ဘတ်(စ်)ကားကြီး သုံးစီး၊ တက္ကစီ ၁၀ စီး၊ ဆိုက်ကားအစီး ၂၈၀ အပြင် မြေစိုက်ဆိုင်းဘုတ် ၄၄ ခုထောင်ပြီး အခုကစ လုပ်ဆောင်ထားပါတယ်။ ဒီလို အစီအစဉ်တွေကို လုပ်ဆောင်ရတာက အိတ်ခ်ျအိုင်ဗွီနဲ့ ပတ်သက်လို့ မိခင်ကနေ ကလေးကို မကူးစက်အောင်၊ မိခင်နို့ တစ်မျိုးတည်းကိုပဲ ခြောက်လအထိ တိုက်ကျွေးဖို့တို့၊ ခြောက်လကျော်သွားရင် ဖြည့်စွက်အစားအစာကျွေးဖို့၊ ကာကွယ်ဆေးထိုးဖို့ စတဲ့မက်ဆေ့တွေကို ပြည်သူလူထုထဲ ကျယ်ကျယ်ပြန့်ပြန့် ရောက်ချင်တဲ့အတွက် ဒီနည်းလမ်းကို အသုံးပြုတာပါ။ ကလေးတွေနဲ့ ပတ်သက်လို့ကတော့ ပထမဆုံးအကြိမ် လုပ်တာပါ" ဟု ကျန်းမာရေး ဦးစီးဌာန၊ ဗဟိုကျန်းမာရေး ပညာဌာနမှ လက်ထောက်ညွှန်ကြားရေးမှူး ဒေါက်တာလှမြသွေးအိန္ဒြာက ဆိုသည်။
အသိပညာပေး စကားများအနက် အသက်ခြောက်လ ပြည့်သည့်အခါတွင် ကလေးအား မိခင်နို့နှင့်အတူ အခြားသော အာဟာရကို ဖြည့်စွက်ကျွေးပါ။ အစားအစာမျိုးစုံကို လုံလုံလောက်လောက် ကျွေးပါ။ အသက်ခြောက်လမှ နှစ်နှစ်အရွယ် ကလေးများကို တစ်နေ့လျှင် နှစ်ကြိမ်မှ လေးကြိမ်အထက် အစာကျွေးပါ။ ဘေးဥပဒ်ကင်းအောင် သန့်ရှင်းစွာ ပြင်ဆင်ချက်ပြုတ်၍ ကျွေးပါ။ ဖြည့်စွက်စာကျွေးရင်း မိခင်နို့ကို ကလေး၏ အသက်နှစ်နှစ်အရွယ်အထိ ဆက်၍တိုက်ပါ စသည့် အသိပေး စကားများအပြင် ပုံမှန်ကာကွယ်ဆေး ထိုးရမည့် အစီအစဉ်များကိုလည်း ထည့်သွင်းရေးသား ဖော်ပြထားကြောင်း သိရသည်။
မြန်မာနိုင်ငံရှိ အသက်ငါးနှစ်အောက် ကလေးစုစုပေါင်း၏ ၃၅ ဒသမ ၁ ရာခိုင်နှုန်း (ကလေးသူငယ် ၂ ဒသမ ၅ သန်း) မှာ ကာလကြာရှည် ခံစားရသည့် အာဟာရချို့တဲ့မှု ဖြစ်နေပြီး ယင်းတို့အနက်မှ ရှစ်ရာခိုင်နှုန်းမှာ ပြင်းထန်အာဟာရ ချို့တဲ့မှုကြောင့် သေဆုံးနေရကြောင်းနှင့် အာဟာရ နိမ့်ကျခြင်းသည် ကလေးသူငယ်များ၏ ကျန်းမာရေး၊ ကာယဥာဏနှင့် ကာယဗလ ဖွံ့ဖြိုးမှုကို ထိခိုက်မှု ဖြစ်စေကြောင်း ကုလသမဂ္ဂ ကလေးများ ရန်ပုံငွေအဖွဲ့၊ ယူနီဆက်(ဖ်)က ထုတ်ပြန်ခဲ့သည်။
ကလေးသူငယ် ရှင်သန်ဖွံ့ဖြိုးရေး အသိပညာပေး စကားများ ရေးသားဖော်ပြထားသည့် တက္ကစီယာဉ်များအား တွေ့ရစဉ် (ဓာတ်ပုံ-အိသဉ္ဇာကျော်)
EMG
0 comments:
Post a Comment