ဝေယံဖြိုးဦး၊ ငြိမ်းဇော်လင်း
ဘဏ္ဍာရေးဝန်ကြီးဌာန ဒုတိယ၀န်ကြီး ဒေါက်တာလင်းအောင် ရှင်းလင်းပြောကြားနေစဉ်
ပိုမိုကောင်းမွန်သော အခွန်ကောက်ခံသည့်စနစ် ဖြစ်ပေါ်လာရေးနှင့် နှစ်စဉ်အခွန်ရငွေ စုစုပေါင်း၏ ရာခိုင်နှုန်း ၉၀ ကျော်ကို ကောက်ခံလျက်ရှိသည့် ပြည်တွင်းအခွန်များဦးစီးဌာနကို ပြုပြင်ပြောင်းလဲရန်ရှိပြီး အခွန်ထမ်းများအား အခွန်ထမ်းမှတ်ပုံတင်ထုတ်ပေးရန် စီစဉ်နေသည်ဟု ဘဏ္ဍာရေးဝန်ကြီးဌာန ဒုတိယ၀န်ကြီး ဒေါက်တာလင်းအောင်က ပြောကြားသည်။
ဇန်န၀ါရီ ၂၀ ရက်က ကျင်းပသည့် ပြည်သူ့လွှတ်တော်အစည်းအဝေးတွင် မန္တလေးတိုင်းဒေသကြီး ပျော်ဘွယ်မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးမြင့်စိုးမေးမြန်းသည့် "ပြည်သူများ အခွန်ထမ်းဆောင်စေလိုစိတ် မြင့်မားလာစေရန် ပိုမိုကောင်းမွန် ထိရောက်သော အခွန်ကောက်ခံသည့်စနစ် ဖြစ်ပေါ်လာစေရေးအတွက် ဆောင်ရွက်ရန် အစီအစဉ် ရှိ မရှိ" မေးခွန်းကို ပြန်လည်ဖြေကြားရာတွင် ယခုလို ထည့်သွင်းပြောကြားခဲ့ခြင်း ဖြစ်သည်။
ဘဏ္ဍာရေးဝန်ကြီးဌာန ဒုတိယ၀န်ကြီး ဒေါက်တာလင်းအောင်က "မြန်မာနိုင်ငံတွင် လက်ရှိကောက်ခံနေတဲ့ အခွန်အမျိုးအစား ၁၄ မျိုးရှိပြီး ပြည်တွင်းအခွန်များဦးစီးဌာနမှ ကုန်သွယ်လုပ်ငန်းခွန်၊ ၀င်ငွေခွန်၊ အောင်ဘာလေ သိန်းဆုခွန်နှင့် တံဆိပ်ခေါင်းခွန်စတဲ့ အခွန်လေးမျိုးကို တာဝန်ယူကောက်ခံလျက်ရှိပါတယ်။ ပြည်တွင်းအခွန်များဦးစီးဌာနမှ ကောက်ခံလျက်ရှိတဲ့ အခွန်လေးမျိုးရဲ့ ကောက်ခံရရှိမှုသည် နိုင်ငံတော်၏ အခွန်ဖွဲ့စည်းပုံမှ အခွန် ၁၄ မျိုး ကောက်ခံရရှိငွေ စုစုပေါင်း၏ ရာခိုင်နှုန်း ၉၀ ကျော်ကို နှစ်စဉ်ကောက်ခံလျက်ရှိပါတယ်။ မြန်မာနိုင်ငံရဲ့ အိမ်နီးချင်းနိုင်ငံများတွင် အခွန်ရငွေနှင့် GDP အချိုးမှာ ၄ ရာခိုင်နှုန်းခန့်သာရှိသဖြင့် အိမ်နီးချင်းနိုင်ငံများနှင့် နှိုင်းယှဉ်ပါက လျော့နည်းနေပြီး တိုင်းပြည်၏စီးပွားရေး နှစ်စဉ်လျော့နည်းနေမှုနှင့် လိုက်လျောညီထွေမရှိကြောင်း စိစစ်တွေ့ရှိရပါတယ်" ဟု ပြောကြားသည်။
ထို့ပြင် နိုင်ငံတော်အတွက် အခွန်အကောက်ရငွေကို အဓိကရှာဖွေပေးနေသည့် ပြည်တွင်းအခွန်များဦးစီးဌာန၏ အခွန်မူဝါဒနှင့် အခွန်စီမံခန့်ခွဲမှုစနစ် ပိုမိုခေတ်မီတိုးတက်ရေးအတွက် နည်းပညာနှင့် အတတ်ပညာဆိုင်ရာ အကူအညီ အထောက်အပံ့များ ရရှိရေးအတွက် ကမ္ဘာ့ဘဏ်၊ အပြည်ပြည်ဆိုင်ရာ ငွေကြေးရန်ပုံငွေအဖွဲ့၊ အာရှဖွံ့ဖြိုးရေးဘဏ်၊ နိုင်ငံတကာအခွန်နှင့် ရင်းနှီးမြှုပ်နှံမှု ဗဟိုဌာန၊ မြန်မာဖွံ့ဖြိုးတိုးတက်မှု အရင်းအမြစ်ဗဟိုဌာန စသည့်နိုင်ငံတကာအဖွဲ့အစည်းများနှင့် ဆွေးနွေးတိုင်ပင်လျက်ရှိကြောင်း၊ အဆိုပါ နိုင်ငံတကာအဖွဲ့အစည်းများ၏ အကြံပြုချက်အရ ပြည်တွင်းအခွန်များဦးစီးဌာနကို ပြုပြင်ပြောင်းလဲရေးအတွက် Reform Plan ရေးဆွဲထားပြီးဖြစ်ကြောင်း ဒေါက်တာလင်းအောင်က ဆိုသည်။
"နိုင်ငံတကာမှာကျင့်သုံးတဲ့အတိုင်း အခွန်ထမ်းများကို အခွန်ထမ်းမှတ်ပုံတင်အမှတ် Tax Identification Number သတ်မှတ်ပေးနိုင်ဖို့ စီစဉ်ဆောင်ရွက်လျက်ရှိပါတယ်။ ပိုမိုကောင်းမွန်ထိရောက်တဲ့ အခွန်ကောက်ခံမှုစနစ် ဖြစ်ပေါ်လာဖို့အတွက် ကျွမ်းကျင်ပညာရှင်များနှင့် ညှိနှိုင်းတိုင်ပင်ခြင်း၊ အောက်ခြေမြို့နယ်များရှိ ရပ်မိရပ်ဖများ၊ လုပ်ငန်းရှင်များနှင့်တွေ့ဆုံ၍ အကြံပြုချက်များ ရယူခြင်းတို့ဖြင့် ပြုပြင်ဆောင်ရွက်လျက်ရှိတယ်" ဟု ဒေါက်တာလင်းအောင်က ဖြည့်စွက်ပြောကြားသည်။
0 comments:
Post a Comment