မင်းသီဟဇော်
မန္တလေး-လားရှိုး-မူဆယ်လမ်းတွင် တရားမ၀င် ကုန်သွယ်မှု တားဆီးထိန်းချုပ်ရေး အဖွဲ့က ယာဉ်များအား စစ်ဆေးနေစဉ် (ဓာတ်ပုံ-ထွန်းနေလှိုင်)
မြန်မာ-တရုတ် နယ်စပ်များတွင် တရားမဝင် ကုန်သွယ်မှုအချို့ ရှိနေဆဲဖြစ်သော်လည်း မြန်မာ-တရုတ် နယ်စပ်မှ တရားဝင် ကုန်သွယ်မှု ပမာဏမှာ ယမန်နှစ်ထက် အမေရိကန်ဒေါ်လာ သန်း ၉ဝဝ ကျော် ပိုမိုရရှိနေကြောင်း သိရသည်။
စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ ကူးသန်းရောင်းဝယ်ရေးနှင့် စားသုံးသူရေးရာ ဦးစီးဌာန၏ စာရင်းများအရ ၂ဝ၁၃-၂ဝ၁၄ ဘဏ္ဍာရေးနှစ် ဧပြီ ၁ ရက် မှ ဇန်နဝါရီ ၁ဝ ရက်အထိ မြန်မာ-တရုတ် နယ်စပ်ကုန်သွယ်ရေး စခန်းများဖြစ်သည့် မူဆယ်၊ ချင်းရွှေဟော်၊ လွယ်ဂျယ်၊ ကန်ပိုက် တီးစသည့် စခန်းလေးခုမှ ကုန်သွယ်မှု ပမာဏမှာ အမေရိကန်ဒေါ်လာ ၃၁၉၉ ဒသမ ၈၃၆ သန်း ရရှိခဲ့ပြီး ၂ဝ၁၂-၂ဝ၁၃ ဘဏ္ဍာရေးနှစ် အလားတူကာလတွင် ယင်းနယ်စပ်စခန်းများမှ ကုန်သွယ်မှုပမာဏမှာ အမေရိကန်ဒေါ်လာ ၂၂၆၅ ဒသမ ၆၄၅ သန်းရရှိခဲ့သောကြောင့် ယခုဘဏ္ဍာရေးနှစ် ကုန်သွယ်မှုမှာ ယခင်နှစ်ထက် အမေရိကန်ဒေါ်လာ ၉၃၄ ဒသမ ၁၉၁ သန်း ပိုမိုရရှိခဲ့ခြင်း ဖြစ်သည်။
မြန်မာ-တရုတ် နယ်စပ်တွင် တရားမဝင် ကုန်သွယ်မှုများ ရှိနေပြီး စားသုံးသူ ကာကွယ်ရေးနှင့် တရားမဝင် ကုန်သွယ်မှု ထိန်းချုပ်ရေး ရွေ့လျားအဖွဲ့ (Mobile Team)မှလည်း ဖမ်းဆီးမှုများ ဆောင်ရွက်နေကြောင်း သိရသည်။
၂ဝ၁၃ ခုနှစ် ဇူလိုင် ၅ ရက်မှ ၂ဝ၁၃ နှစ်ကုန်အထိ မြန်မာ-တရုတ် နယ်စပ်ကုန်သွယ်ရေး လမ်းကြောင်းတစ်လျှောက်တွင် ကျပ်သိန်းပေါင်း ၈၄၇၃ ကျော်တန်ဖိုးရှိ တရားမဝင် သယ်ဆောင်လာသော အကောက်ခွန်မဲ့နှင့် ကန့်သတ်ကုန်ပစ္စည်းများကို ဖမ်းဆီးရမိခဲ့ကြောင်း သိရသည်။
အကောက်ခွန် ဦးစီးဌာနမှလည်း တရုတ်-မြန်မာနယ်စပ် ကုန်သွယ်ရေးလမ်းကြောင်းရှိ စစ်ဆေးရေး စခန်းများတွင် တရုတ်နှင့် ကုန်သွယ်ဆောင်ရွက်ရန် သယ်ဆောင်လာသည့် ကျောက်စိမ်းအပါအဝင် အခြားပစ္စည်းများကိုလည်း တားဆီးအရေးယူခဲ့ရသည့် ဖြစ်စဉ်များ ရှိခဲ့ကြောင်း သိရသည်။
မြန်မာနိုင်ငံနှင့် ဆက်စပ်လျက်ရှိသော အိမ်နီးချင်း နိုင်ငံများနှင့် နယ်စပ်ကုန်သွယ်မှု ပြုလုပ်နိုင်ရန် မြန်မာ-အိန္ဒိယ၊ မြန်မာ-ထိုင်း၊ မြန်မာ-တရုတ်၊ မြန်မာ-ဘင်္ဂလားဒေ့ရ်ှတို့ နယ်စပ်ကုန်သွယ်ရေး စာချုပ်များ ချုပ်ဆိုထားပြီး ဖြစ်ကြောင်း သိရသည်။
အိမ်နီးချင်း နိုင်ငံများနှင့် နယ်စပ်ကုန်သွယ်ရေး ပိုမိုတိုးမြှင့် ဆောင်ရွက်နိုင်ရန်အတွက် ထိုင်း၊ တရုတ်နယ်စပ်များတွင် ကုန်သွယ်ရေးစခန်းများ ထပ်မံဖွင့်လှစ်နိုင်ရန် လျာထားဆောင်ရွက်ထားကြောင်း ကူးသန်းရောင်းဝယ်ရေးနှင့် စားသုံးသူရေးရာ ဦးစီးဌာန သတင်းအချက်အလက် များအရ သိရသည်။
ထပ်မံဖွင့်လှစ်ရန် လျာထားသည့် နယ်စပ်ကုန်သွယ်ရေး စခန်းများမှာ မြန်မာ- တရုတ် နယ်စပ်တွင် မိုင်းလားနယ်စပ် ကုန်သွယ်ရေးစခန်း၊ မြန်မာ-ထိုင်းနယ်စပ်တွင် မယ်စဲ့ကုန်သွယ်ရေးစခန်း၊ ဘုရားသုံးဆူ ကုန်သွယ်ရေးစခန်း၊ ပုံပါကျင်နယ်စပ် ကုန်သွယ်ရေးစခန်းတို့ ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ သိရသည်။
နယ်စပ်ကုန်သွယ်မှုတိုးတက်စေရန်နှင့် တရားမဝင်ကုန်သွယ်မှုလျော့နည်းလာစေရန် နယ်စပ်ဒေသနေ ဒေသခံများအတွက် တစ်ပိုင်တစ်နိုင် ကုန်သွယ်မှုကတ်များထုတ်ပေးခဲ့ကာ နယ်စပ်ကူးသန်းရောင်းဝယ်ရေးစခန်းများမှ ကုန်သွယ်မှုဆောင်ရွက်စေခဲ့ကြောင်း သိရသည်။
0 comments:
Post a Comment