နေပြည်တော်သတင်းအဖွဲ့
ကုလသမဂ္ဂဆိုင်ရာ အဂတိလိုက်စားမှုတိုက်ဖျက်ရေး သဘောတူစာချုပ် အကောင်အထည်ဖော်ဆောင်ရွက်ခြင်း အမျိုးသားအဆင့် နှီးနှောဖလှယ်ပွဲ ကျင်းပနေစဉ်
ဇန်န၀ါရီ ၂၀ ရက်က သင်္ဂဟဟိုတယ် အစည်းအဝေးခန်းမ၌ ကုလသမဂ္ဂဆိုင်ရာ အဂတိလိုက်စားမှုတိုက်ဖျက်ရေး သဘောတူစာချုပ် အကောင်အထည်ဖော် ဆောင်ရွက်ခြင်း အမျိုးသားအဆင့် နှီးနှောဖလှယ်ပွဲကို ကျင်းပခဲ့ကြောင်း သိရသည်။ မြန်မာနိုင်ငံ အဂတိလိုက်စားမှု တားဆီးကာကွယ်ရေး ကော်မတီအတွက် အဂတိလိုက်စားမှု တားဆီးကာကွယ်ခြင်းမူဝါဒများ၏ ပုံစံသစ်များဖြင့် UNCAC ၏ လိုအပ်ချက်များနှင့်အညီ ဆောင်ရွက်သွားမည်ဖြစ်ကြောင်း အဆိုပါနှီးနှောဖလှယ်ပွဲမှ သိရသည်။
အဂတိလိုက်စားမှု တားဆီးကာကွယ်ခြင်းကို မြန်မာနိုင်ငံအနေဖြင့် ၂၀၁၂ ခုနှစ် ဒီဇင်ဘာ ၂၀ ရက်တွင် အစိုးရ၏ ပြုပြင်ပြောင်းလဲခြင်းအဆင့် ပိုမိုခိုင်မာစေရန်အတွက် UNCAC ကို အရှေ့တောင်အာရှနိုင်ငံများတွင် နောက်ဆုံးအဖွဲ့ဝင်နိုင်ငံအနေဖြင့် လက်မှတ်ရေးထိုးခဲ့ပြီး ထိုကွန်ဗန်းရှင်းကို အတည်ပြုပြီးနောက် မြန်မာနိုင်ငံ၏ အဂတိလိုက်စားမှုကို ဖြေရှင်းရန်အတွက် တတိယအဆင့် ပြုပြင်ပြောင်းလဲခြင်း ဆောင်ရွက်မည်ဟု ကြေညာခဲ့သည့်နောက် ၂၀၁၃ ခုနှစ် ဇန်န၀ါရီ ၉ ရက်တွင် အဂတိလိုက်စားမှု တားဆီးကာကွယ်ရေးကော်မတီကို ဖွဲ့စည်းခဲ့ကြောင်း သိရသည်။
ပြည်ထောင်စုရှေ့နေချုပ်ရုံး ညွှန်ကြားရေးမှူးချုပ် ဦးကျော်ဆန်းက"အဂတိလိုက်စားမှု တားမြစ်ရေးကို မြန်မာနိုင်ငံက ပါဝင်ပြီးနောက်မှာ အကောင်အထည်ဖော်ဖို့အတွက် တာဝန်တွေရှိလာတယ်။ ပထမဆုံးအနေနဲ့ကတော့ အဂတိလိုက်စားမှု တိုက်ဖျက်ရေးဥပဒေကို ပြဋ္ဌာန်းထားပြီးပြီ။ ပြဋ္ဌာန်းထားပြီးတဲ့အခါမှာ အသေးစိတ်အကောင်အထည်ဖော်ဖို့ကို စတင်ဆောင်ရွက်ရမယ်။ အကောင်အထည်ဖော်ဖို့အတွက် ကော်မရှင်ကြီးကို ဖွဲ့စည်းရမယ်။ အပြည်ပြည်ဆိုင်ရာနဲ့ အမြင်တွေဖလှယ်ကြမယ်။ ရလဒ်ကောင်းတွေကို ကော်မရှင်ကြီးကိုတင်ပြသွားမယ်။ ကျွန်တော်တို့ရုံးကနေပြီး UNODC နဲ့ပူးပေါင်းဆောင်ရွက်ခြင်းဖြစ်ပါတယ်။ ဥပဒေအကောင်အထည်ဖော်လာရင် ဥပဒေကို အားလုံးလိုက်နာရမယ်။ အစိုးရအဖွဲ့အစည်းတွေအားလုံး၊ ပြည်သူတွေအားလုံး၊ တာဝန်ရှိတဲ့သူတွေအားလုံးပေါ့"ဟု ပြောကြားသည်။
မြန်မာနိုင်ငံသည် UNCAC တွင်ဖော်ပြထားသည့် အခန်းကဏ္ဍနှစ်ခုတွင်ပါရှိသည့် ရာဇ၀တ်မှုဆိုင်ရာ၊ တရားဥပဒေစိုးမိုးရေးနှင့် နိုင်ငံတကာ ပူးပေါင်းဆောင်ရွက်ခြင်းတို့ကို ၂၀၁၃-၂၀၁၄ ခုနှစ် အချိန်ကာလအတွင်း နိုင်ငံတကာအဆင့်သုံးသပ်ခြင်း လုပ်ငန်းစဉ်များကို အသုံးပြု၍ ထိုအခန်းကဏ္ဍနှစ်ခုကို အကောင်အထည်ဖော် ဆောင်ရွက်ခြင်းဖြင့် မြန်မာနိုင်ငံ၏ အဂတိလိုက်စားမှု တားဆီးကာကွယ်ရေးကော်မတီအတွက် ဒေသတွင်းနှင့် တခြားသောနိုင်ငံများမှ အတွေ့အကြုံရရှိရန် အဂတိလိုက်စား တားဆီးကာကွယ်ခြင်းမူဝါဒများ၏ ပုံစံသစ်များကို UNCAC ၏ လိုအပ်ချက်များနှင့်အညီ ဆောင်ရွက်သွားမည်ဖြစ်ကြောင်း သိရသည်။
အဆိုပါဆွေးနွေးပွဲတွင် UNCAC ကို အကောင်အထည်ဖော်ရာတွင် အဓိကကျသည့် အချက်ငါးချက်ဖြစ်သည့် ကွန်ဗန်းရှင်းနှင့်အညီ UNCAC တွင် သတ်မှတ်ထားသည့် သတ်မှတ်ချက်များ၊ တရားဥပဒေဆိုင်ရာနှင့် ပြန်လည်ပြင်ဆင်သည့် မူဝါဒများကို ခြုံငုံသုံးသပ်ခြင်း၊ မြန်မာနိုင်ငံအနေဖြင့် UNCAC အကောင်အထည်ဖော်မှုကို လေ့လာသုံးသပ်ရန် ကြိုတင်ပြင်ဆင်ခြင်း၊ UNCAC ၏ အဖွဲ့အစည်းဆိုင်ရာ လိုအပ်ချက်များ၊ UNCAC အခန်းကဏ္ဍကို အကောင်အထည်ဖော် ဆောင်ရွက်ရာတွင် မဟာဗျူဟာနည်းဖြင့် ချဉ်းကပ်ခြင်းကို တိကျသည့် အဂတိလိုက်စားမှုဆိုင်ရာ တားဆီးကာကွယ်ရေးမူဝါဒနှင့် အစိုးရအဖွဲ့အစည်းများ၏ အဂတိလိုက်စားမှု တားဆီးကာကွယ်ရေးပူးပေါင်း ညှိနှိုင်းအားထုတ်ခြင်း၏ အရေးကြီးမှုကို မီးမောင်းထိုးပြလိုခြင်းနှင့် UNCAC ကို အကောင်ထည်ဖော် ဆောင်ရွက်ရာတွင် လူမှုအဖွဲ့အစည်းများနှင့် ပုဂ္ဂလိကအခန်းကဏ္ဍတို့ကို ပူးပေါင်းဆက်သွယ် ဆောင်ရွက်ခြင်းတို့ဖြစ်ကြောင်း သတင်းရရှိသည်။
0 comments:
Post a Comment