ဆီးရီးယားကို သြဂုတ် ၂၉ ရက်တွင် စတင်တိုက်ခိုက်ဖွယ်ရှိကြောင်း အမေရိကန် ပြောကြား

ပြင်သစ်လေယာဉ်တင်သင်္ဘော ချားဒီဂေါကို ၂၀၁၁ ခုနှစ် သြဂုတ်က ပြင်သစ်တောင်ပိုင်းဆိပ်ကမ်း တိုလွန်တွင် တွေ့ရစဉ်

ဆီးရီးယားတွင် အစိုးရက အရပ်သားများကို ဓာတုလက်နက်များဖြင့် တိုက်ခိုက်မှု ဖြစ်ပွားခဲ့သည်ဟု စွပ်စွဲမှုများ ပေါ်ထွက်ခဲ့ပြီးနောက် အမေရိကန်နှင့် မဟာမိတ်တပ်များသည် ဆီးရီးယားကို တိုက်ခိုက်ရန် ပြင်ဆင်နေကြောင်း ခန့်မှန်းမှုများ မြင့်မားနေချိန်တွင် အမေရိကန် ထိပ်တန်းတာဝန်ရှိသူများက ဆီးရီးယားကို သြဂုတ် ၂၉ ရက် အစောဆုံးထား တိုက်ခိုက်ဖွယ်ရှိကြောင်းကို NBC News ပြောကြားခဲ့ကြောင်း သိရသည်။ သို့သော် ဆီးရီးယား အစိုးရကို အပြောင်းအလဲ ပြုလုပ်ရန် မဟုတ်ဘဲ သမ္မတ ဘာရှားအယ်လ်အာဆတ် အစိုးရအား အပြစ်ပေးရန်သာ ရည်ရွယ်ကြောင်း ၎င်းတို့က ပြောကြားခဲ့သည်။ အိမ်ဖြူတော်သည် အာဆတ်အစိုးရကို ဖြုတ်ချရန် မစဉ်းစားကြောင်း အမေရိကန်သမ္မတ ဘာရက်အိုဘားမား ပြောခွင့်ရပုဂ္ဂိုလ် ဂျေးကာနေးက ပြောကြားခဲ့သည်။

အမေရိကန်နှင့် မဟာမိတ်များ အရှိန်ယူနေ
အမေရိကန်နှင့် မဟာမိတ်တို့သည် ရေငုပ်သင်္ဘောများ၊ စစ်သင်္ဘောများ၊ လေယာဉ်များ အသုံးပြုကာ ဆီးရီးယားပြင်ပ ရေပိုင်နက်နှင့် ဝေဟင်တို့မှတစ်ဆင့် ပစ်ခတ်တိုက်ခိုက်ဖွယ် ရှိသည်ဟု လေ့လာသူများက သုံးသပ်ထားသည်။ ဆီးရီးယားကို တိုက်ခိုက်ပါက ရက်ပိုင်းသာ ကြာမြင့်နိုင်ပြီး စစ်ဘက်အဆောက်အအုံများကို ပစ်မှတ်ထားနိုင်သော်လည်း ဓာတုလက်နက်များကိုမူ ပစ်မှတ်ထားဖွယ် မရှိကြောင်း ၀ါရှင်တန်ရှိ သတင်းရင်းမြစ်များက ဆိုသည်။ ဆီးရီးယား အဓိကအတိုက်အခံ (SNC) ကလည်း လေဆိပ်များ၊ စစ်အခြေစိုက် စခန်းများ၊ လက်နက်ရုံများ စသည်တို့ ပါဝင်သည့် ပစ်မှတ်များကို လမ်းညွှန်ပေးမည်ဖြစ်ကြောင်း သိရသည်။ ဆီးရီးယား အတိုက်အခံ လက်နက်ကိုင် အဖွဲ့ဖြစ်သော (FSA) နှင့် မဟာမိတ်နိုင်ငံတို့ကြား ဆွေးနွေးပွဲများ ပြုလုပ်ခဲ့ကြောင်း SNC တာဝန်ရှိသူ တစ်ဦးက ပြောကြားခဲ့သည်။

ကာကွယ်ရေး ၀န်ကြီးဌာနသည် လေကြောင်းတိုက်ခိုက်မှုကို သုံးရက်ကြာ ဆောင်ရွက်ရန် စီစဉ်ထားကြောင်း၊ မြေထဲပင်လယ်တွင်းရှိ ရေတပ်ဖျက်သင်္ဘောများ၊ ရေငုပ်သင်္ဘောများမှ ဒုံးကျည်တိုက်ခိုက်မှုများ ဆောင်ရွက်သွားမည်ဖြစ်ကြောင်း ထိပ်တန်းတာဝန် ရှိသူများက NBC News ကို ပြောကြားခဲ့ကြောင်း သိရသည်။ အမေရိကန်သည် မကြာသေးမီ ရက်များအတွင်းက မြေထဲပင်လယ်တွင်းမှ ဖျက်သင်္ဘောများကို မြေထဲပင်လယ် အရှေ့ဘက်စွန်းရှိ ဆီးရီးယားအနီးသို့ ရွှေ့ဆိုင်းခဲ့ရာ ရေတပ်သင်္ဘောများဖြစ်သည့် USS Barry၊ USS Mahan၊ USS Ramage နှင့် USS Gravely တို့သည် တိုက်ခိုက်ရန် အသင့်ဖြစ်နေကြောင်း ရေတပ်တာဝန် ရှိသူများက ပြောကြားခဲ့သည်။

ဓာတုလက်နက် တိုက်ခိုက်မှုအတွက် ဖြစ်လာနိုင်သော လက်တုံ့ပြန်မှု
အမေရိကန် စစ်တပ်သည် အဆင်သင့် ရှိနေပြီဖြစ်ပြီး သမ္မတ ဘာရက်အိုဘားမား၏ အမိန့်ကို စောင့်ဆိုင်းနေကြောင်း ကာကွယ်ရေးဝန်ကြီး ချက်ဟေဂယ်က ပြောကြားခဲ့သော်လည်း ၀ါရှင်တန်က နောက်ဆုံးဆုံးဖြတ်ချက် မချရသေးပေ။ ဆီးရီးယား နိုင်ငံခြားရေးဝန်ကြီး ၀ါလက်မူအာလင်က မိမိတို့တွင် အညံ့ခံ အရှုံးပေးခြင်းနှင့် ကိုယ့်ကိုယ်ကိုယ် ကာကွယ်ခြင်း နည်းလမ်းနှစ်ခုအနက် ဒုတိယနည်းလမ်းသည် အကောင်းဆုံး ဖြစ်မည်ဖြစ်ကြောင်း သြဂုတ် ၂၇ ရက် အစောပိုင်းတွင် ပြောကြားခဲ့သည်။ ဓာတုလက်နက်ဖြင့် တိုက်ခိုက်မှု နောက်ကွယ်တွင် ပါဝင်သူများအား အပြစ်ပေးရန် ပြင်သစ်က အဆင်သင့်ဖြစ်နေကြောင်း သမ္မတ ဖရန်ဆွာအော်လွန်ဒ်က ပြောကြားခဲ့သည်။

သြဂုတ် ၂၇ ရက်တွင် အိုဘားမားသည် ကင်မရွန်ထံ ဖုန်းဆက်ပြီး ဆီးရီးယားအရေး ကိစ္စကို ဆွေးနွေးခဲ့ကြောင်း၊ အိုဘားမားသည် သြစတြေးလျ၊ ကနေဒါ၊ ပြင်သစ် ခေါင်းဆောင်များနှင့်လည်း ဖုန်းဆက်ဆွေးနွေးခဲ့ကြောင်း အိမ်ဖြူတော်က ထုတ်ပြန်ခဲ့သည်။ ဆီးရီးယားအပေါ် စစ်ရေးဖြင့် အရေးယူမှုအား မဟာမိတ်ရုရှားနှင့် အီရန်တို့က ကန့်ကွက်ထားသည်။ သို့သော် ဆီးရီးယား မဟာမိတ်ဟောင်းနှင့် ဒေသတွင်း အင်အားကြီး တူရကီကမူ ယင်းဓာတုလက်နက်ဖြင့် တိုက်ခိုက်မှု ဖြစ်စဉ်အတွက် တာဝန်ရှိသူများ အပြစ်ပေးမခံရဘဲ လွတ်မြောက်နေမှုမှာ မဖြစ်သင့်ကြောင်း ပြောကြားခဲ့သည်။

Ref:AFP



ကုလသမဂ္ဂ၏ ထောက်ခံမှု၊ သဘောတူညီမှု မရှိဘဲ လုပ်ဆောင်ခဲ့သော စစ်ဆင်ရေးများ

ကိုဆိုဗို (Operation Allied Force)
နေတိုးတပ်ဖွဲ့များသည် ၁၉၉၉ ခုနှစ်၊ မတ် ၂၄ ရက်တွင် ယူဂိုဆလားဗီးယားကို လေကြောင်းမှ တိုက်ခိုက်ခဲ့ပြီး ဇွန် ၁၁ ရက်အထိ ကြာမြင့်ခဲ့သည်။ အစိုးရနှင့် လူများစု အယ်ဘေးနီးယား လူမျိုးစု ကိုယ်စားလှယ်တို့အကြား ငြိမ်းချမ်းရေးဆွေးနွေးပွဲ ပျက်ပြားခဲ့ပြီးနောက် ယင်းကဲ့သို့ တိုက်ခိုက်ရန် ညွှန်ကြားခံရခြင်း ဖြစ်သည်။ ရုရှားနှင့် တရုတ်ကမူ ကုလဆုံးဖြတ်ချက်ကို ဗီတိုသုံးမည်ဟု ခြိမ်းခြောက်ခဲ့သည်။ ယူဂိုဆလားဗီးယားခေါင်းဆောင် ဆလိုဘိုဒန်မီလိုဆီဗစ်က ငြိမ်းချမ်းရေး သဘောတူညီချက်ကို အကြိမ်ကြိမ်ငြင်းဆိုမှုနှင့် ကိုဆိုဗိုလွတ်မြောက်ရေး တပ်မတော်အား ယူဂိုဆလားဗီးယားက ထိုးစစ်ဆင်မှုတို့အပေါ် တုံ့ပြန်ခြင်း ဖြစ်သည်။ နိုင်ငံ ၁၃ နိုင်ငံမှ လေယာဉ်အစင်း ၆၀၀ ၀န်းကျင်က ယူဂိုဆလားဗီးယား ပြည်နယ်များဖြစ်သော ကိုဆိုဗို၊ မွန်တီနီဂရိုနှင့် ဆားဗီးယားတို့ကို လေကြောင်းမှ နေ့စဉ်တိုက်ခိုက်ခဲ့သည်။

အီရတ် (March 2003 Operation Iraqi Liberation-Operation Iraqi Freedom)
ဖျက်အားပြင်း လက်နက်များ ရှိသည်ဟု သံသယရှိသောကြောင့် အီရတ်ကို စစ်ရေးဖြင့် အရေးယူရေး ကုလဆုံးဖြတ်ချက် ရရှိရန် အမေရိကန်၊ ဗြိတိန်နှင့် စပိန်တို့က ကြိုးပမ်းခဲ့သည်။ ပြင်သစ်၊ ဂျာမနီနှင့် ရုရှားတို့က ကန့်ကွက်ခဲ့ကြသည်။ အီရတ်သမ္မတဟောင်း ဆက်ဒမ်ဟူစိန်ကို နောက်ဆုံးရာဇသံပေးပြီးနောက် ကုလဆုံးဖြတ်ချက် မပါဘဲ တိုက်ခိုက်ရန် အမေရိကန် သမ္မတဟောင်း ဂျော့ဒဗလျူဘုရ်ှက ဆုံးဖြတ်ခဲ့သည်။ ၂၀၀၃ ခုနှစ် မတ် ၂၀ ရက်တွင် အမေရိကန်က ဘဂ္ဂဒက်ကို လေကြောင်းမှ တိုက်ခိုက်ပြီး ဗြိတိန်နှင့် အမေရိကန် မြေပြင်တပ်ဖွဲ့များက နိုင်ငံတောင်ပိုင်းကို တိုက်ခိုက်ခဲ့သည်။ ဆက်ဒမ်အစိုးရအား ဖြုတ်ချနိုင်ခဲ့ပြီး ဖမ်းဆီးခဲ့ကာ အီရတ်တရားရုံး၌ ၂၀၀၆ ခုနှစ် ဒီဇင်ဘာ ၃၀ ရက်တွင် ကြိုးပေးခဲ့သည်။ မေလတွင် အမေရိကန် ဦးဆောင်သော နိုင်ငံစုံတပ်များ တပ်ဖြန့်ခဲ့သည်။ ၂၀၁၁ ခုနှစ် ဒီဇင်ဘာတွင် အမေရိကန် တပ်အားလုံးနီးပါး ရုပ်သိမ်းခဲ့သည်။

လစ်ဗျား (March 2011 Operation Unified Protector)
လစ်ဗျားအာဏာရှင် မွမ်မာကဒါဖီ သစ္စာခံတပ်များ၏ တိုက်ခိုက်ခံနေရသော အရပ်သားများအား ကာကွယ်ပေးရန် ဖြစ်နိုင်သမျှ နည်းလမ်းအသုံးပြုခွင့်ပေးသည့် ကုလလုံခြုံရေးကောင်စီ ဆုံးဖြတ်ချက် ၁၉၇၃ ကို ၂၀၁၁ ခုနှစ် မတ် ၁၇ ရက်တွင် ချမှတ်ခဲ့သည်။ မတ် ၁၉ ရက်တွင် အမေရိကန် ထောက်ပံ့မှုပါသော ဗြိတိန်နှင့် ပြင်သစ်တပ်များ ဦးဆောင်ပြီး စစ်ဆင်ရေး စတင်ခဲ့သည်။ မတ် ၁၁ ရက်တွင် နေတိုးက ဦးဆောင်ခဲ့ပြီး နိုင်ငံ ၁၈ နိုင်ငံ ပါဝင်ခဲ့သည်။ နေတိုးသည် ကုလဆုံးဖြတ်ချက်ကို ကျော်လွန်လုပ်ဆောင်နေသည်ဟု တရုတ်နှင့် ရုရှားတို့က စွပ်စွဲခဲ့သည်။ ထရီပိုလီမြို့ကို လစ်ဗျားသူပုန်များ သိမ်းနိုင်ခဲ့ပြီးနောက် အောက်တိုဘာ ၂၀ ရက်တွင် ကဒါဖီမွေးရပ်မြေ ဆာတီ၌ စစ်ဆင်ရေး တစ်ခုအတွင်း ကဒါဖီအား အသေဖမ်းမိခဲ့သည်။

Ref:AFP




အမေရိကန် လေတပ်ဝက်ဘ်ဆိုက်မှ ရယူထားသည် အက်ဖ် ၁၅ အီးဂဲတိုက်လေယာဉ်များ