လက်ပံတောင်းတောင် ကြေးနီစီမံကိန်းကြောင့် ဒေသတွင်း မွေးမြူရေးလုပ်ငန်း ထက်ဝက်ခန့် ကျဆင်းသွားကြောင်း သိရသည်။
စစ်ကိုင်းတိုင်းဒေသကြီး ဆားလင်းကြီးမြို့နယ် လက်ပံတောင်းတောင် ဒေသရှိ မိုးကြိုးပြင်၊ ဆည်တည်း၊ ဖောင်းကား၊ ကျော်ရွာ၊ ရွှေလှေ၊ ၀က်မှေး၊ ကံတော၊ တုံ၊ လယ်တီ၊ ဇီးတော စသည့်ကျေးရွာများတွင် ဆိတ်၊ သိုးမွေးမြူရေးကို တောင်သူလုပ်ငန်းနှင့် တွဲဖက်၍ အဓိကထား လုပ်ကိုင်ခဲ့ကြပြီး လက်ပံတောင်းတောင် စီမံကိန်း ပေါ်ပေါက်လာခဲ့ပြီးနောက်တွင် ယာမြေများနှင့် စားကျက်မြေများ တဖြည်းဖြည်း ဆုံးရှုံးလာခဲ့မှုကြောင့် မွေးမြူထားသည့် ဆိတ်အုပ်၊ သိုးအုပ်များကို ပြန်လည်ရောင်းချမှု များပြားလာခဲ့ကြောင်း ဒေသခံများထံမှ စုံစမ်းသိရှိရသည်။
"ဒီဘက်ရွာတွေ အကုန်လုံးက လက်ပံတောင်းတောင်ကြီးကို အမှီပြုပြီး မွေးမြူရေး လုပ်ကြရတာ။ စီမံကိန်း အတွင်းမှာရှိတဲ့ ယာမြေတွေ၊ စားကျက်မြေတွေကို သိမ်းပြီး သံဆူးကြိုး အကာအရံတွေ လုပ်လိုက်တော့ ဆိတ်၊ သိုးကျောင်းစရာမြေက တဖြည်းဖြည်း နည်းလာတယ်။ အဲဒီလိုသာ ဆက်လုပ်နေမယ်ဆိုရင် စားကျက်မြေနဲ့ စိုက်ပျိုးမြေတွေ အကုန်ပျောက်သွားမှာပဲဆိုပြီး ဆိတ်၊ သိုးအုပ်တွေ အကုန်ရောင်းလိုက် ကြတယ်" ဟု ဆည်တည်းကျေးရွာမှ ဆိတ်၊ သိုး မွေးမြူရေး လုပ်ကိုင်သူ ဦးသိန်းအောင်က ဆိုသည်။
"အရင်က ဒီကျေးရွာတွေမှာ ဆိတ်၊ သိုးမွေးမြူရေးကို တောင်သူလုပ်ငန်းနဲ့တွဲပြီး လုပ်ကိုင်တဲ့သူ သုံးပုံနှစ်ပုံလောက် ရှိတယ်။ အခု သုံးပုံတစ်ပုံလောက်ပဲ ကျန်တော့တယ်။ မွေးမြူရေးဘက်က၀င်တဲ့ ၀င်ငွေလျော့နည်းသွားသလို တောင်သူလုပ်ငန်းအတွက် မြေသြဇာလည်း ၀ယ်သုံးနေရပြီ။ ဆိတ်၊ သိုး၊ နွားချေးမြေသြဇာနဲ့ဆို သုံးနှစ်လောက် ကောင်းကောင်းစိုက်ပျိုးလို့ ရတယ်။ အခုတော့ ဓာတ်မြေသြဇာ ၀ယ်သုံးနေရတာ" ဟု တောင်သူကြီး ဒေါ်ခင်စန်းက ပြောပြသည်။
အဆိုပါ ကျေးရွာများရှိ တောင်သူများ အနေဖြင့် ဆိတ်အကောင်ရေ (၅၀)တစ်အုပ်လျှင် ကျပ် (၂၅)သိန်း ရင်းနှီးမြှုပ်နှံ၍ မွေးမြူလုပ်ကိုင်ကြပြီး ခြောက်လတစ်ခါ ပြန်လည်ရောင်းချရာမှ တစ်နှစ်လျှင် ငွေကျပ်ကိုးသိန်း ဆယ်သိန်းခန့် ၀င်ငွေရရှိကြောင်း၊ ဆိတ်တစ်ကောင်လျှင် ငါးသောင်း၊ သိုးတစ်ကောင်လျှင် ခြောက်သောင်းခုနှစ်သောင်းကျပ် ဈေးရှိကြောင်း သိရသည်။
(လက်ပံတောင်းတောင် အနီးတွင် ဒေသခံများ မွေးမြူထားသော ဆိတ်အုပ်အား လွှတ်ကျောင်းနေသည်ကို တွေ့ရစဉ် (ဓာတ်ပုံ-အောင်သူ))
EMG
0 comments:
Post a Comment