တနသာင်္ရီတိုင်းဒေသကြီးရှိ ထားဝယ်အထူး စီးပွားရေးဇုန် စီမံကိန်းမှ မြောက်ဘက် ငါးမိုင်ခန့်အကွာ တလိုင်းဒတ်တောင် ကျောက်ထုတ်စခန်း ၀န်းကျင်ရှိ ဥယျာဉ်ခြံမြေများနှင့် လယ်ယာမြေများမှာ ယခုနှစ် မိုးတွင်းကာလတွင် ပျက်စီးခဲ့ရသဖြင့် ဆုံးရှုံးနစ်နာခဲ့သူ ၁၁ ဦးအား စီမံကိန်း တည်ဆောက်နေသည့် အီတာလျံ-ထိုင်းကုမ္ပဏီ (Italian-Thai Development Co;Ltd-ITD)မှ လျော်ကြေးငွေများ ပေးချေရန် နိုဝင်ဘာ ၂၉ ရက်က ဒေသခံများနှင့် သဘောတူ လက်မှတ်ရေးထိုးခဲ့ကြောင်း သိရသည်။
"ကျွန်တော်တို့ လေ့လာရသလောက်က ကျောက်ထုတ်နေတဲ့နေရာ ၀န်းကျင်မှာရှိတဲ့ လယ်မြေတွေက အထိခိုက်ဆုံး ဖြစ်နေပါတယ်။ မိုးရွာလိုက်တဲ့ အချိန်မှာ တောင်ပေါ်ကနေ သဲတွေ၊ မြေစာတွေ ပြိုဆင်းလာမှုနဲ့ ကားလမ်းတစ်လျှောက်က ရေမြောင်းတွေ မကောင်းလို့ လယ်မြေတွေ ရေနစ်ဆုံးရှုံးခဲ့တာ တွေ့ရတယ်။ ဒီနေ့ သဘောတူလက်မှတ် ရေးထိုးခဲ့တဲ့သူတွေ အနေနဲ့ ဒီဇင်ဘာ ၂ ရက်မှာ လျော်ကြေးငွေ ထုတ်ပေးသွားမှာ ဖြစ်ပါတယ်။ တလိုင်းဒတ်တောင်က ထားဝယ်စီမံကိန်းရဲ့ ဧရိယာမှာ ပါဝင်ခြင်း မရှိပါဘူး။ နိုင်ငံတော် အစိုးရက ဒီတောင်က ထွက်လာတဲ့ ဟာတွေကို ဒေသအစိုးရကနေ အခွန်ကောက်ခံ နိုင်ရန်အတွက် စီမံကိန်း ပြင်ပနေရာမှာ ထားခြင်းဖြစ်ပါတယ်။ စီမံကိန်း ပြင်ပနေရာဖြစ်တဲ့ တောင်ခြေက ထိခိုက်နစ်နာသူ ဒေသခံတွေကိုတော့ တိုင်းဒေသကြီး အစိုးရအဖွဲ့၊ ထားဝယ်အများပိုင် ကုမ္ပဏီ (DDPC)နဲ့ ITD ကုမ္ပဏီတို့က တာဝန်ယူပြီး ဖြေရှင်းပါလိမ့်မယ်။ အခုပေးတဲ့ လျော်ကြေးကို မကျေနပ်လို့ စောဒကတက်ရင်တော့ လျော်ကြေးပေးအပ်ခြင်း မပြုတော့ဘဲ ပြန်လည်ရုပ်သိမ်းပါမယ်။ နောက်တစ်ကြိမ် ထပ်မပေးတော့ပါဘူး။ ဒါနောက်ဆုံး ပေးခြင်းပါပဲ" ဟု လျော်ကြေးငွေ ပေးအပ်မှုနှင့် ပတ်သက်ပြီး လူမှုဝန်ထမ်း ကယ်ဆယ်ရေးနှင့် ပြန်လည်နေရာ ချထားရေး ၀န်ကြီးဌာန ဒုဝန်ကြီး ဦးဘုန်းဆွေက ပြောကြားခဲ့သည်။
ကျောက်ထုတ်စခန်း ၀န်းကျင်အနီး စီမံကိန်း ဧရိယာအတွင်းရှိ ဒေသခံ ၁၁ ဦး၏ ဆုံးရှုံးခဲ့သော သီးနှံပင်များကို လျော်ကြေးငွေ ပေးချေရာတွင် ရော်ဘာပင် တစ်ပင်အတွက် အပင်သက်တမ်း ၁ နှစ်မှ ၃ နှစ်အတွင်း ရှိပါက ကျပ်တစ်သောင်း၊ သက်တမ်းသုံးနှစ်မှ ခြောက်နှစ်အတွင်း ရှိပါက ကျပ် ၇၀၀၀၀ နှင့် ခြောက်နှစ်နှင့် အထက်ရှိသော အပင်များအား ကျပ်တစ်သိန်းနှုန်းဖြင့် သဘောတူ သတ်မှတ်ခဲ့ကြောင်း သိရသည်။
(တလိုင်းဒတ် ကျောက်ထုတ်စခန်းအား နိုဝင်ဘာ လဆန်းအတွင်းက တွေ့ရစဉ် (ဓာတ်ပုံ - ဖြိုးဇင်))
EMG
0 comments:
Post a Comment